RSS

Ալիսիա Կիրակոսյան

19 Մրտ

ԱլիսիաԵվ Աստված
Առանց հողաթափերի
Իմ ննջարանը մտավ գիշերով,
Ոտնահետքերը
Թողնելով իբրև
Քանդակված պատգամ:

Իր պատուճանը
Նա կախեց պատից
Եվ իմացություն
Հեղեց ինձ վրա:

Մենք մի հայացքով
Բարեկամացանք:
Նա ճանաչում էր
Արդեն իմ հոգին:

Եվ նա լսել էր
Ռախիտով հիվանդ
Պատմությունները
Մի կույր ամբոխի,
Որը կարծում էր,
Թե իբր Աստված
Կոշիկ է հագնում:

Բայց Աստված արդեն
Ճանաչում էր ինձ:
Եվ իմ ուսերի
Կնիքը, որ խոլ
Մրրիկներն էին
Սեղմելով թողել,
Ծանոթ էր նրան:

Եվ նա ցանկացավ
Ինձ արդարություն անել
Գաղտնորեն:
Եվ ննջարանս
Մտավ գիշերով,
Պարզորեն,
Առանց հողաթափերի:

Բոբիկ էր Աստված:
Ես ննջարանս կարգի բերեցի:

Թարգմանությունը՝ Վահագն Դավթյանի

***

Ինձնից այնքան ես բացակա եղել,
Որ, ներիր, արդեն պետք չէ
քո սերը…
Ու ես քեզ այնքան, այնքան եմ հիշել,
Որ մոռացել եմ
ներկայությունդ…
Ես ստեղծել եմ
Մի դեմք,
Մի ժպիտ
Ու մի լուռ հայացք,
Որ նմանությունն ու օրինակն են
Ինչ-որ մի դեմքի,
Ինչ-որ ժպիտի,
Ինչ-որ հայացքի:
Ես քեզ, սիրելի՛ս, փոխել եմ ահա
Ինձ բաժին ընկած մենություններից
մենավորի հետ
Եվ հենց դրանով արտաքսել եմ
իմ մենությունը:

***

Սերը գոյության հանճարն է միակ,
Սիրո հակառակն
………………………………..ամենևին էլ

Չսիրելը չէ,
………………….մա՛հն է պարզապես…

Սիրահարները
Անմահությունն են վերանորոգում:

***

Ես նպատակից ուզում եմ գաղթել
Դեպի ապրումը…
Ձգող ուժ դառնալ:
Ուզում եմ ձայնի ալիքին թառած,
Հասնել իմ սիրուն
Ու դառնալ նրա
Վերջին սահմանը…

Ուզում եմ սիրո
Հավատք ներմուծել,
Որ սկիզբ առնի
Ամբողջացումը…

***

Որտե՞ղ ես արդյոք,
Անձկություններիս
Հուռութք և աստված,
Իմ ճակատագրի
Անխուսափ ցուցմունք,
Իմ երազների
Անհավատ երազ,
Քամու դեմ հորդած
Իմ ուժերի ուժ,
Որտե՞ղ ես արդյոք…

Որտե՞ղ ես արդյոք,
Իմ երակների
Հորդացող արյուն,
Արյան բերկրություն,
Որտե՞ղ ես արդյոք:

Ինչո՞ւ չես տեսնում
Անհամբերությունն
Իմ հասունացած,
Ինչո՞ւ չես գալիս,
Որ վերջ տաս արդեն
Աչքերիս հոգնած
Սպասումներին…

***

Ես վախենում եմ
Սեր բառը ասել,
Զի նախազգում եմ,
Որ սիրուց անդին
ամայություն է…
Ես վախենում եմ, որ սերը միայն
Բառ լինի, որ ես
Ճաշակեմ բառն այդ
Եվ քաղցած մնամ:
Ու ես ինքս ինձ օգնում եմ հիմա,
Որ այս աշխարհում
Պահպանեմ սերը,
Որն ամենքինն է
Ու իմն է միայն:
Եվ դա համարյա այն միակ բանն է,
Որ իմն է միայն:
Ես վախենում եմ դարձյալ ու դարձյալ,
Որ սերն աշխարհում
Ամեն ինչ լինի,
Որ սերն աշխարհում
Չլինի ոչինչ…

 
 

Պիտակներ՝ , , , ,

Թողնել պատասխան

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Փոխել )

Google photo

You are commenting using your Google account. Log Out /  Փոխել )

Twitter picture

You are commenting using your Twitter account. Log Out /  Փոխել )

Facebook photo

You are commenting using your Facebook account. Log Out /  Փոխել )

Connecting to %s

 
%d bloggers like this: